مين قال ان اللى فات مات ؟؟قصة حب صحوبيه ( بس بعلم الأهل )

زائر

قالت والدة شادي لوالدة ندى في الهاتف.
فريدة: ايه الي بنتك بتقوله دا يا فايزة؟, هي خلاص استحلت القعدة عندكو وعايزة تفضل عندكو على طول.
ردت والدة ندى وهي تحاول ان تكظم غيظها.
فايزة: لا مفيش قعاد ولا حاجة هي البنت بس لسة متأثرة بالي حصل فانا مقعداها عندي باخد بالي منها شوية , بس هي ان شاء الله هترجع بيتها قريب.
فريدة: ازاي بقى , دانا الي عرفته غير كده, انا عرفت ان انتو طالبين الطلاق.
ثمتت والدة ندى لتبتلع الكلمة للحظة, وقالت محاولة تماسك اعصابها.
فايزة: احنا مطلبناش حاجة يا حجة فريدة, دا بس ندى وشادي اعصابهم تعبانة.
فريدة: لا انا ابني اعصابه مبتتعبش الا لما بيتخانق مع بنتك, لو عايزين طلاق يعني احنا معندناش مانع, بس ابقو افتكروا ان انتو الي طلبتو.
بدأت والدة ندى تحتد قليلا , وهي تقول.
فايزة: استغفر الله العظيم, يا حجة فريدة قلتلك مفيش كلام من دا, انتي اكيد فهمتي غلط, وبعدين احنا مش محتاجين نكبر المواضيع دي عشان ميبقاش فيه غلط اكتر من كده, دول بس اتلعيال بيشدو مع بعض زي كل مرة.
فريدة: الغلط من عندكو يا حبيبتي ومن عند بنتكو, انا ابني معملش غير كل خير, احنا شايلين ندى على كفوف الراحة, لا حد بيتدخل في حياتها ولا بيجي جمبها, ولما سقطت كان الكل حواليها, هي الي اتقلبت من ساعتها على ابني معرفش ليه؟, وهو ماله؟, هو كان هو الي سقطها يعني, بصي يافايزة اذا ندى معقلتش انا بحذركو عشان النتيجة هتبقى مش كويسة.
قالت والدة ندى بشيء من الغضب الذي يعتمل بصدرها.
فايزة: هو ايه الي بحذركو؟ , ياحجة فريدة مفيش داعي للغلط والكلام دا, وبعدين المفروض احنا مالناش دعوة, فيه رجالة تتكلم في الكلام دا.
فريدة: يعني انا مرضتش اكبر الموضوع وادخل الرجالة عشان تدخلهم فيه طلا ق بجد, يعني هو انتي عايزة كده؟, طيب انا كنت بس خايفة على بنتك, بس الظاهر ان انتي الي مش خايفة عليها, مع السلامة يا فايزة.
واغلقت الهاتف بوقاحة, فقالت والدة ندى بغيظ.
فايزة: استغفر الله العظيم, استغفر الله العظيم, الست دي اكيد مجنونة, ايه قلة الادب والذوق الي هي فيها دي؟, ربنا يسامحك يا بنتي يالي جبتيلنا قلة الادب .
*********************
شادي: ياماما انتي ليه عملتي كدة؟.
صاح شادي بأمه في غيظ بعد ان علم مافعلته بأم ندى.
الام: الله, يعني عايزني اشوفك بتتبهدل واسكت.
شادي: انا مشتكتلكيش انتي كده كبرتي الموضوع وبوظتي الدنيا.
الام: انا معملتش دا الا علشان مصلحتك, هي مش طلبت الطلاق؟, ما تديها الي هي عايزاه,انت لحد امتى هتفضل بتطاطي وهي قاعدة تبهدل فيك, هي من الاول مكانتش تنفعك.
شادي: وانتي مالك, انتي مــاااااالك, حاجة بيني وبين مراتي, تدخلي امها وابوها في الموضوع ليه؟, كده كبرتي وولعتي الدنيا.
الام: خليها تكبر انت عايز تصغرها له يعني؟, باقي على ايه وعايز منها ايه ماخلاص.
شادي: يا ستي انا مطلبتش مساعدتك ,انا كنت هحلها.
الام: لا ياشادي مكنتش هتعرف تحلها وكنت هتجيلي, زي كل مرة كنت هتجيلي عشان احلهالك.
شادي: برضة مالكيش مبرر ابدا للي عملتيه.
الام: انا قلت اخلصك من وقف الحال الي انت فيه ده, عشان تعرف راسك من رجليك.
شادي: ربنا يسامحك يا ماما بجد ربنا يسامحك, انا مش عارف اقلك ايه بعد الي عملتيه دا, ربنا يستر بقى من الي هيجرى.
*******************
ظلت ندى صامتة محاولة تمالك نفسها حتى لا تبكي امام والديها الذان وقفا يحادثانها بغضب.
الاب: انتي كبرتي الدنيا , على موضوع هايف, انتي طول عمرك مبتسمعيش الكلام, فاكرة الطلاق دا حاجة سهلة, انتي عارفة يعني ايه متطلقة, انتي خلاص اتجننتي, وخليتي واحدة زي دي تتصل تكلمنا بالطريقة دي وتبهدل امك , انا كنت عارف انها عيلة واطية من الاول, وانتي كنتي بتتمسكي بيه من الاول ليه لما انتو مش عايزين بعض, خلاص من حتة مشكلة اد كده عايزة تجري تهربي, امال انتي كنتي فاكرة الدنيا ايه؟.
ندى: ......................
الاب: ماتنطقي , ورطتينا معاكي مع ناس معندهاش ذوق ولا اخلاق , وبتتكلمي وكأن ملكيش كبير يكسر دماغك, خلاص مش انتي الي طلبتي الطلاق, اتفضلي اشربي يا ستي جوزك وعيلته , الي هيبيعو ويشترو فيكي, انا كنت عارف من الاول ان احنا لو دخلنا في مشاكل معاهم مش هنطلع كسبانين.
هتفت ندى بكل ما يختلج بصدرها من حزن.
ندى: بس بقى ,كسبانين ولا خسرانين احنا مش في ماتش, انا مش طايقة اسمع كلام عنهم خلاص, انا بكرههم كلهم, واحد واحد, اعملو الي انتو عايزينه, تطلقوني متطلقونيش , انا خلاص مش عايزة منكو حاجة ولا منه.
واخذت تبكي بشدة ,وهي تفكر.
"كده ياشادي, اهون عليك بالسرعة دي دا الكلام ملحقش يبرد على لساني, اوام جريت على مامتك وقلتلها وهي اوام قالت اما اولع الدنيا,وما استنتش تشوف بتكلم بجد ولا بهدد, للدرجة دي بايعني ومستغني عني, انا كنت حاسة برضة انك ماهتصدق بس مكنتش متخيلة بالسرعة دي, ربنا يسامحك بجد, انا مصدومة فيك صدمة عمري, اكبر من صدمتي فيك ايام سلمى"
*****************
تنهد شادي وهو يقود سيارته عائدا من عمله وهو يفكر حزينا بعد ان خرج من المكتب لا يكاد يطيق النظر الى سلمى.
" بقى كده ياندى؟, قلتي لاهلك انك طبتي مني الطلاق, وكبرتي الدنيا وعرفتي العيلتين, وياريتك بتردي عليا , بس انا خلاص مش هكلمك بعد الي عملتيه, الي حصل دا كله غلطك انتي, انتي السبب في كل الي احنا فيه بغيرتك وغبائك وصغر مخك, سلمى يه وزفت ايه, ماهي سلمى اهي مخطوبة وشكلها بتحب احمد دا الي هي مخطبواله, عايزة مني ايه بقى , ياخسارة حبي فيكي سنين, للدرجة دي تهون عليكي كل حياتنا دي مع بعض؟, دانتي اتغيرتي اوي اوي ومبقتش عارفك, مش انتي ندى الي اتمنيت اعيش عمري معاها,انتي خلتيني خلاص انا كمان مش عايزك من كتر ماحسستيني انك بايعاني, اشربي بقى يا ستي اختيارك, ومترجعيش تزعلي, ومش انتي الي كبرتي الموضوع, اسيبه بقى لاهلي واهلك, اما نشوف هيعملو فينا ايه"
**********************
" والله المؤخر الي مكتوب في العقد هو دا الي هياخدوه"
قالت والدة شادي هذا في برود, فصاح شادي بها.
شادي: بس دا استهبال يا ماما.
الام: والله يا بني هو دا حق ربنا, كل شيء كان بالاتفاق وهو دا الي هما وافقو عليه وبرضاهم, احنا مضربناهمش على ايدهم, احنا قلنا الي عاجبه عاجبه والي مش عاجبه يمشي ,و هما وافقو.
شادي: بس انا الي خليت ندى توافق.
الام: طيب يا حبيبي وهو انت مجبتلهاش حاجة يعني؟, مانت جبتلها.
شادي: ماهي باعتهم وادتهملي.
الام: يعني مش هي باعتهم بارادتها برضة, ولا انت ضربتها على ايدها؟.
شادي: يعني يكون هو دا ردي عليها؟.
الام: يا حبيبي انت عملت كل الي عليك, ولو على شوية العفش الي جابوهم ياخدوهم في ستين سلامة خلاص, انت مش عايز حاجة منهم.
شادي: ازاي يعني ياماما انا لازم اديها حقها الشرعي.
الام: وهو دا حقها الشرعي زي ما الورق بيقول.
شادي: لا ياماما بس دا ظلم.
الام: طيب يا بني حط ايدك في جيبك وطلعلها كام الف جنية مؤخر او تعويض.
شادي: احط ايدي في جيبي؟.
الام: ايوة امال انت فاكر ايه يا حبيبي تتجوز وتطلق واحنا ندفع, هنجيبلك منين, احنا اخر فلوس شايلينها لاخوك وجوازه, هنجيب فلوس تانية منين ماخلاص, شطبت انت واخوك على كل الي كان معانا.
صمت قليلا قبل ان يقول بعناد.
شادي: مش مهم انا هبيع العربية واديها حقها.
الام: حقها ايه ياحبيبي, العربية باسمي وحسك عينك تفكر تبيعها, ولو راجل خليني كده امضي على عقد بيع.
عاد يصيح بها.
شادي: لاااا كده كتير ياماما.
هتفت به تنهره.
الام: انت هتيجي تتشطر عليا, لما انت معرفتش تتشطر عليها وتخليها تعقل جاي تستهبل على امك, لا يا حبيبي, انت تحترم نفسك واعرف انك بتكلم امك, انت عايز تزعل امك عشان خاطر واحدة مش عايزاك, دا ربنا يوديك النار عشاني مش عشانها, انت خلاص بتنسى انا بعمل ايه علشانك.
شادي: بس كده انتي بتحطيلي العقدة في المنشار زي ما بتعملي كل مرة.
الام: لا ياشادي, مش انا الي بهدلتك ووديتك وجبتك, شوف مراتك الي انت فضلتها عليا وعلى الدنيا كلها ومين فينا الي مبهدلك, وادك خلتني هقولك الكلمة الي عمري ماقلتهالك...يانا يا ندى يا شادي, واما نشوف هتختار مين.
*******************
قالت والدة ندى وهي تهتف بشدة.
الام: لاااااا كله الا دا يا عادل, دا استهبال.
قال الاب بغضب عارم.
الاب: انا كنت عارف ان هما هيقولو كده, عشان بنتنا غبية وضيعت حقها بايديها, مبسوطين دلوقتي وهي طالعة منفضةمن غير ولا مليم من غير حتى حقوقها الشلاعية, انا مش قلتلك هياكلوكي ومش هيسيبوكي, انا مش عارف اعملك ايه, شوفيلك حل يا ست هانم.
الام: يادي المصيبة يادي المصيبة.
الاب: انا الراجل ابوه دا انا لو شفته في الشارع انا هضربه, الي مالوش كلمة دا, بس احنا الي غلطانين احنا الي عملنا كده في بنتنا ورضينا تتنازل عن حقها, انا كان المفروض كنت اضربك واعرف اربيكي قبل ما تجبريني احط ايدي في ايد الزبالة دول.
بكت ندى بحرقة وهي تقول.
ندى: ان مش عايزة حاجة انا مش عايزة منهم حاجة, انا عايزة ابعد عنهم على قد ما اقدر, انا مش طايقة اسمع عنهم, انا بكرههم كلهم, واولهم شادي, انا عايزة اتطلق منه, لا اتطلق ايه انا عايزة اخلعه, انا مش عايزة اشوف وشه ولا حد يتكلم عليه قدامي خاااالص.

زائر

نسمة: انا بجد نفسي هايدي ماتسافرش الا بعد الفرح.
عمر: ان شاء الله, هي مش قالتلك هستنى.
نسمة: اصل انا بصراحة نفسي اشوفلها عريس, نفسي اجيبلها حد قبل ماتسافر يمكن تعد, محدش من اصحابك....
قاطعها قائلا وهو يقود.
عمر: لا ابوس ايدك بلاش تحرجيني مع حد الله يخليكي, هي صحيح بقت كويسة بس لو سأل عليها هيبقى شكلي انا الي وحش.
ضربته نسمة على يده وهي تقول.
نسمة: اخص عليك ياعمر, اذا كنت انت بتقول كده امال الناس هتقول ايه؟.
عمر: انا بقول الي كل الناس بتقوله احنا بشر يا نسمة ومبننساش, وخصوصا في الحاجات دي, وهي عارفة كده, عشان كده ازكى حاجة الي هي هتعمله دا, لما تسافر هتتنسي وهترتاحو والنس كمان هتنساها عشان تعرف تعيش شوية يمكن تقابل حد من هناك الله اعلم نصيبها فين.
نسمة: انا الي هيجنوني ندى وشادي, نفسي حد يتدخل ويصالحهم.
عمر: طب ماتتدخلي انتي.
نسمة: اخاف يا عمر.
عمر: ايه المشكلة, اذا مكنتيش انتي اختها تتدخلي امال مين الي هيتدخل, ما تجبيها في مرة وتخرجو وانا هحاول اجيب شادي او حتى اعرف هو فين واقلك تروحي, ايه رأيك؟.
نسمة: انا مش عارفة يا عمر, انا بقول منتدخلش في قدر ربنا.
عمر: انتي عبيطة يا بنتي امال مين الي هيصالحهم , انتي مش شايفة الدنيا مولعة ازاي؟.
نسمة: طيب يا عمر ان هحاول بس ممكن ماما تموتني لو عرفت.
عمر: لا ان شاء الله انتي بس حاولي وربنا يستر.
********************
قالت ندى بغضب وهي تخرج من المصعد مع نسمة للتوجة الى شقتها.
ندى: انا قلتلك مش عايزة انزل من العربية, عايزاني في ايه يعني؟,مطبخ ايه دا الي هبص عليه, احنا مش خلصناه امبارح وقفلناه.
قالت وهي تفتح الباب.
نسمة: تعالى بس اصل انا غيرت فيه حاجات.
ودخلت تدفعها امامها في رفق, بينما ندى غاضبة, وبمجرد مرورها ساحة الاستقبال بالبيت تسمرت امام الانترية, اذ وجدت عمر جالسا به مع شادي الذي اندهش بدوره.
قام عمر لياخذ نسمة من يدها ويبتعدا, وهو يقول بهدوء.
عمر: نسيبكو لوحدكو.
وخرجا في اتجاه الشرفة وعمر يدفع نسمة دفعا.
قال شادي بعد فترة صمت باقتضاب.
شادي: انا مكنتش عارف انك جاية.
ندى: ولا انا ولو كنت عارفة مكنتش جيت.
شادي: طبعا مانتي خلاص بعتي.
ندى: بقلك ايه يا شادي احترم نفسك, عشان انت السبب في كل الي بيحصلنا دا.
شادي: انا السبب؟؟, ليه؟, هو انا الي قلت انا عايزة اتطلق ورحت فضحت الدنيا في كل حتة.
ندى: لا انا الي جريت على ماما احكيلها زي كل مرة وولعت الدنيا.
شادي: بصي ياندى انا مكنتش عايز اتكلم معاكي عشان عارف انك بتقلبي الدنيا وبتحبي تطلعيني انا الغلطان وانتي الضحية.
قالت والعبرات تخنق صوتها.
ندى: عشان انت غلطان, وبعدين الفلوس الي انتو بتتكلمو فيها دي انا مطلبتهاش, انا مش عايزة منك حاجة اصلا يا استاذ شادي, وانت عارف كويس ان مش انا الي هتكلم في شوية فلوس, عشان احنا كنا بنتجوز مكنتش انت داخل محل بتشتريني.
والتفتت لتخفي دموعها فشعر شادي بالاشفاق عليها وببعض الحنين, فقال بشيء من الهدوء.
شادي: وانا ماشترتكيش يا ندى وعمري مااتكلمت في فلوس وانتي عارفة.
ندى: انا مبقتش عارفاك.
شادي: وانا متغيرتش.
ندى: انا مش عارفة انت ازاي تعمل كده, ومامتك ازاي تعمل فيا كده.
شادي: ندى انتي عارفة كويس مين الي بدأ.
ندى: الي بدأ ايه ولا ايه, احنا لو عدينا هنتوه ياشادي.
قال بأسف.
شادي: ماهو الي بينا تاريخ.
ارتعشت ونظرت اليه بحزن.
ندى: وانت مبسوط دلوقتي؟.
صمت قبل ان يقول باقتضاب.
شادي: يعني انتي متخيلة ان انا هكون مبسوط واحنا بيحصل لنا كل دا.
ندى: احنا مبقاش ينفع نرجع لبعض.
شادي: الحكاية خرجت من ايدي ياندى, والدنيا ولعت بين اهلنا فعلا ,بس انا لسه بحبك ولسه باقي عليكي وانتي لسه مراتي.
نظرت اليه باشتياق شديد قبل ان تعود الدموع لتغرق عينيها وكأنها تذكرت.
ندى: معادش حاجة من دي تنفع خلاص, المشكلة كبرت واهلنا متخانقين, واحنا مش صافيين لبعض.
شادي: وانا مش عارف احنا ممكن نخرج من الي احنا فيه دا ازاي.
ندى: مش هنخرج.
شادي: ...................
ندى: .................
******************
جذب عمر نسمة الملتصقة بباب الشرفة محاولة التسمع لما يجرى بالداخل, واجلسها على احد المقاعد.
عمر: ابعدي يابنتي عن الباب , سبيهم براحتهم.
ابعدت يديه عنها وهي تقول بضيق.
نسمة: عايزة اعرف بيقولو ايه, يعني مكنتش عارف تقعده في الصالون مقعده في الانتريه, كده انا مش هسمع حاجة.
عمر: مش لازم تسمعي.
نسمة: انا حاسة ان الي احنا عملناه دا غلط, مهما شادي وندى اتصالحو, عمر الدنيا ماهتهدا ما بين اهلنا واهله, مامته اتخانقت مع ماما كذا مرة وغلطت كتير, وكمان بابا مش عايز يكلم باباه وبيقول لما يبقى راجل ابقى اكلمه, انا خايفة اوي لاكون بزود المشكلة.
جلس امامها وهو يقول بحزم.
عمر: ممكن تهدي, مادام انتي قصدك خير ان شاء الله يحصل خير, وبعدين هما الاتنين دول اصل المشكلو لو اتحلت, هيعرفو يهدو الاهل او حتى هيقولولهم مالكوش دعوة بينا تاني, احنا اتصالحنا, ومحدش يحب ابدا ان يحصل طلاق, ولا انتي اهلك عايزين ندى تتطلق؟.
نسمة: اكيد لا, بس عارف عمر الكلام ما بيتمسح.
اقترب منها وامسك يدها بحب.
عمر: بصي يا حبيبتي, البيوت عاملة زي الرسمة لو كذا حد مسك فرشة وقعد يلون فيها مش هتطلع لوحة هتطلع كارثة, عشان كده لازم الحاجات دي تبقى بين الاتنين الي في البيت وبس, متكبرش ومتخرجش برة, ودا درس ليكي برضة يا ام لسان طويل.
نسمة: انا لساني طويل؟.
ضغط على يدها موبخا وهو يقول.
عمر: ايوة يالي بتروحي تقولي كل حاجة لخالتو.
نسمة: لا مدام اميرة انا متعودة احكيلها على كل حاجة, وبعدين انا من ساعة خطوبتي الاولانية وانا قلت مش هخبي حاجة تاني, عشان انا لما بخبي بتحصل مشاكل.
عمر: تقومي تروحي تحكي لخالتي الي هي على طول بتقول لمامتي, لا شاطرة.
نسمة: ماخلاص بقى يا ميرو مانا قلتلتلك اسفة ومش هعمل كده تاني.
عمر: لا يا حبيبي انا بس بفكرك.
نسمة: استنى استنى كده, هما سكتو ولا ايه, ياترى ايه الي بيحصل.
والقت يده وهي تقوم لتلتصق بالباب ثانية, تتسرق السمع مرة اخرى علها تلتقط شيئا مما يقال.
عمر:والله العظيم مجنونة, انا عارف انك مجنونة.
*****************
وقفت ندى بتردد امام والدته الجالسة تقرأ فقالت الام.
الام: مالك ياندى قاعدة من ساعة مارجعتي تروحي وتيجي وتعدي وتخرجي وتمشي, مالك عايزة ايه؟.
نظرت ندى لوالدتها بقلق قبل ان تستجمع شجاعتها لتقول.
ندى: ماما , انا شفت شادي النهاردة.
التفتت الام في جزع وهي تلقي الكتاب من يدها وهتفت بندى.
الام: شفتيه فين, وقالك ايه؟,انتي مش كنتي نازلة مع اختك؟, اوعي يكون عملك حاجة, امه كانت معاه.
ندى: بس ياماما اهدي, مفيش حاجة من دي حصلت.
الام: وقلتيله ايه؟.
ندى: انا مش عارفة ياماما بجد اعمل اية, احنا مستحيل نرجع لبعض, مش كده برضة؟.
الام: انتي اتجننتي ياندى, عايزة ترجعيله تاني, بعد ما عملنا كل دا علشانك, هو احنا عيال صغيرة بنلعب معاكي,وهترجعي تاني ازاي ان شاء الله.
بدأت ندى في البكاء.
ندى: ..........معرفش.
الام: امال مين الي يعرف يا ندى, انا زهقت منك ومن رجوعك في كلامك وترددك, بتبهدلينا معاكي وتحرجينا وتضيعي حقك كل مرة وتستاهلي تاخدي على دماغك, عايزة تضيعي حقك ازاي المرة دي, هتتنازلي عن ايه تاني, بعد ماشتموكي وهزأوكي وباعو واشترو فيكي وفينا, وقالو نرميها ملهاش عندنا حاجة, ايه؟, ضحك عليكي بكلمتين ؟, عشان يرجعك يمرمطك, وامه تبهدلك, انتي عارفة لو ابوكي عرف هيعمل فيكي ايه؟, هيقولك روحي وانتي حرة ملكيش اهل وملكيش راجل, ولو موتوكي محدش هيقولهم انتو بتعملو ايه, بس الغلطة مش غلطتك , الغلطة غلطتنا من الاول ان احنا سمعنا كلامك, وقلنا ان شادي راجل, وهو مطلعش راجل وهيفضل طول عمره كده سلبي ومش هيقدر لا يحميكي ولا يعملك حاجة.
اخذت ندى تكمل بكائها بشدة.
الام: انا مش هسمع كلامك المرة دي, انتي لازم تاخدي حقك من الي حصل عشان لو مأخدتيهوش ورجعتي كده, قولي على نفسك بقى يارحمن يارحيم.

زائر

الام: عايزة ترجع يبقى تيجي تعتذرلي وتعتذرلك.
قال شادي بعصبية لوالدته التي تصيح بغضب.
شادي: هو ايه دا ياماما؟, هي مغلطتش فينا عشان تعتذر.
الام: ازاي يعني يابني مغلطتش؟, امال لما سابتك وقعدت في بيت امها غضبانة دا مش غلط؟, ولا لما امها ردت عليا وحش واهلها وقفو قدامنا, لا لا يا بني مينفعش ترجع بالساهل كده , ندى مترجعش الا لما تعتذر.
امسك شادي رأسه وهو يصيح.
شادي: ياماما انا عايز ارجع مراتي بقى.
الام: بص يا شادي, انت تعوز الي تعوزه, من امتى يعني الي كنت عايزة صح, مانت قعدت عايز ندى عايز ندى لغاية ماطلعت عينك وماورتكش يوم حلو, فانت اسمع الكلام بقى مرة في حياتك, ندى دي هترجع البيت وبعدها باسبوعين هتبقى في بيت ابوها, دي مش بتاعة عمار, دي هبلة انت اتجوزت واحدة هبلة وكل يوم برأي, يا ابني يا حبيبي انت ورطت نفسك وما صدقت تطلع من التوريطة, تقوم عايز ترجع تاني بنفسك.
قال شادي باستسلام.
شادي: ياماما انا بحبها.
هتفت به كأنه طفل.
الام: واديك عرفت ان الحب مبيفتحش بيوت, خلاص بقى, بطل تكلمني في الموضوع دا تاني يا شادي, لان انا لا عمري هروح ارجعهالك, ولاا عمري لساني هيخاطب لسان الناس دول تاني, الي عايز يرجع يرجع بأدبه.
********************
ندى: ماما مش عايزاني ارجع, قالتلي مش هرجعك الا لما يجي هو وامه يعتذرو هنا في البيت, ويكتبلك حقك الشرعي بقى عشان الناس دي مش مضمونة.
قالت ندى ذلك بحزن الى اختها.
هالة: عندها حق طبعا.
ندى: انا مش عارفة بجد, انا لما شفت شادي كنت عايزاه, بس بعد ما اتكلمت مع ماما حسيت ان الموضوع بعيد اوي وصعب اوي, وان شادي ميستاهلش, حاسة اني كنت حمارة.
هالة: وهو شادي وافق يطلق؟.
ندى: معرفش, هو عايز يطلق ولا يعمل ايه, انا مش عاجبني حالي كده متعلقة, مش عارفة انا ايه؟, ولا هو عايز ايه.
هالة: ولا كمان مستنيين نخلعه, ماهو هو دا الي ناقص, نمشيه وندفعله فلوس كمان.
قالت ندى بسخرية حزينة.
ندى: هما اصلا حاطين مهر كبير وعاملين حسابهم يا اختي, حتى دا مش هينفع.
هالة: بصي ياندى انتي في حالتك دي, احسن حاجة طلاق باتفاق لان سكة المحاكم هتطلعك فاضية ملكيش حاجة.
وضعت ندى يدها على قلبها وهي تقول بقلق.
ندى: محاكم؟, محاكم ايه يا هالة , لا طبعا مفيش محاكم ان شاء الله.
هالة: يبقى خلاص, صلي استخارة ياندى, والخير هيحصل.
ندى: انا خايفة اوي يا هالة, خايفة اسيبه وخايفة اكتر ارجعله.
هالة: صلي استخارة ياندى واسمعي الكلام.
ردت بحزن.
ندى: حاضر ان شاء الله.
**************************
نظر عمر الى ندى الجالسة على اريكة بشقة نسمة شاردة تماما, ثم همس بأذن نسمة.
عمر: هو ايه الي حصل بالظبط؟.
تنهدت نسمة وهي تقول بصوت خفيض.
نسمة: لما اتكلمت هي وشادي عشان تقوله نهدي المواضيع ونحاول نلم العيلتين ونفكر ازاي نرجع من غير مشاكل, قالها ان مامته راسها والف سيف ندى تروح تعتذرلها وقالها انا مستغني عن اعتذارك ليا بس ماما راكبة دماغها, وانا لقيت ياعمر اختي ركبها ستين عفريت وزعقتله وبهدلت الدنيا وكان ناقص تشتم امه, قالتله دا انا امي قالتلي انك تيجي تعتذر انت ومامتك وانا وقفتلها وبهدلت الدنيا تقوم انت عايزني اجي اعتذر لا كده كتير بجد.
عمر: طيب هي زعلانة ليه؟, هما مش كانو خلاص قرروا طلاق, خلاص , كده كده كانت خسرانة.
نسمة: انت بتتريأ يا عمر, هو فيه حاجة اصعب من انك تسيب حد, امال بقى لو حد انت عمرك كله قضيته معاه, ربنا لا يوريك.
عمر: بس انا شايف ان هي كده احسن, يعني الناس دي طلعت وحشة اوي, واحسن حاجة حصلتلها انها بعدت عنهم.
نسمة: بس الزعل الي بيحصل يا عمر بيبقى صعب اوي, اسوأ شيء في الدنيا انك تفارق حد, ربنا يبعد عنا الشر.
عمر: طب وهو؟.
نسمة: زعقلها هو كمان, وقالها يعني انا بحاول اهدي وانتي عايزة تشعللي, انا طالب انك تيجي على نفسك شوية وتيجي تعتذري, وانتي تقوليلي مامتك تيجي لحد عندنا , مين الاسهل انه يجي, لو كنتي عايزانا نرجع بجد, كنتي اتنازلتي, بس انتي راكبة دماغك من الاول, ومش عايزة تتنازلي, عايزة الناس كلها تيجي تعمل الي انتي عايزاه بالظبط, زي زمان فاكرة الكون هيمشي زي مانتي عايزة, ومش عايزة تتحملي نتايج غلطاتك, بس بقى هي قامت قافلة في وشه السكة, ومن ساعتها مجابتش سيرته في البيت.
قال عمر بأسف.
عمر: انا مش عارف الاتنين دول مالهم كده , كل مابيقربو بيبعدو اكتر.
نسمة: انا بجد مش عارفة من كتر ماهي صعبانة عليا انا مش قادرة اعملها حاجة.
*****************
علي: اية؟؟, بت يا اية؟.
تلفتت اية حولها تبحث عمن يناديها, الى ان لمحت علي يعبر السيارات راكضا نحوها, فقالت بفرح شديد.
اية: علي المصري؟؟.
صافحها بحرارة وهو يسألها.
علي: اخبارك ايه يابنتي؟,واخبار اختك الهبلة؟.
اية: جابت علي عقبالك.
علي: ايه دا على اسمي؟, ماشاء الله.
اية: استنى اوريهولك عالموبايل, بس انت علي بس, هو عليّ بالشدة.
علي: عليّ علي اي حاجة وريهولي الكلب دا, ماشاء الله ربنا يخليه جميل, مش شبه مروة يعني,ههههه, اقلب صور يمين ولا ايه , ايه دا دي صورة ندى وريني دي في فرحها , تصدقي انا لغاية دلوقتي ماشفتش صور ليها.
قالت اية بسخرية.
اية: فرحها ايه بقى, الله يكون في عونها.
انزل الهاتف من يده وهو يقول باندهاش.
علي: لا اله الا الله , ليه كده هي مالها؟.
اية: دي ياعيني في مشاكل من يوم ما اتجوزت, انت عارف انها حملت وسقطت؟.
علي: لا حول ولا قوة الا بالله, ماكنتش عارف.
اية: اه والله وبعدها اهي خلاص طالبة طلاق وفي مشاكل.
علي: يااااه للدرجة دي؟, ايه الي حصل لكل دا؟.
اية: مامة شادي مانت عارفها, غير كده شادي نفسه اتغير من يوم ما اتجوزو وكده, وهي على اعصابها على طول, الله يعينها.
علي: لا بجد زعلتيني اوي عليها, ابقي هاتيلي نمرتها عشان اكلمها, والله كلكو واحشني اوي, انا كنت هنا بظبط حاجات في معمل المستشفى, وبعدين وانا نازل افتكرت انك قايلالي انك بتشتغلي في الصيدلية قلت ابص لما لقيته معاد خروج يعني, سبحان الله لقيتك بتعدي قلت اوقفك.
اية: والله واحشني بجد يا مصري,وانت يابني لا خطبت كده ولا اتجوزت, قاعد ليه لسه؟.
امسك يدها يقلبها وينظر اليها مازحا.
علي: يعني ما شفتش دبلة منورة في ايدك يعني.
اية: ياسيدي بلا قرف جواز ايه وهم ايه, الواحد عايش كده حياته.
علي: مانا لما قلت كده قلتولي مجنون.
اية: المهم , ابقى كلمني بقى بما انك قاعدلك هنا يومين عشان نخرج زي زمان.
علي: دا اكيد يا بنتي انا كنت اصلا كده كده هكلمك.
اية: لا ان شاء الله الملك العيال, والله انا نفسي المهم من زملن بقيت بشوفهم كل فين وفين.
علي: لا هعتمد عليكي في الموضوع دا انا نفسي اشوفكو اوي.
**********************
ندى: وهو... لسه مخطبش؟.
اية: لا ومجابش سيرة انه عمل كده اصلا.
تأنت ندى قبل ان تقول.
ندى: ومسألكيش على هايدي؟.
اية: لا طبعا ويسألني انا عنها ليه؟.
ندى: اصل انا كنت سمعت من نسمة انهم اصحاب.
اية: معرفش, بس انتي عارفة علي مالوش في العك, لما بيركز مع واحدة بيركز معاها اوي, وبعدين انا عمري ما سمعتله حكاية من بعد حكايتك بقى.
ندى: حكايتي ايه يا ستي بطلي الكلام دا, انا ماليش حكاية معاه.
اية: وهو علي نسيكي؟, يا بنتي دا لغاية فرحك كلمني سألني, وبعدها مبقتش اعرف اخباره الا تخاطيف.
ترددت ندى قبل ان تقول بحذر.
ندى: تفتكري يا ايه؟, علي كان بيحبني بجد؟.
اية: معرفش, بس الي اعرفه ان علي مش بتاع هزار.
ندى: والله علي واحشني جدا, ونفسي اعد اتكلم وارغي معاه زي زمان, بس مينفعش.
اية: هو ايه دا الي مينفعش, عادي يا بنتي, هو مش قافش منك ولا حاجة بالعكس.
ندى: بصي انا وعلي مكناش ننفع لبعض.
اية: ليه بقى ان شاء الله, كان ينفعلك شادي اوي, اهو طلع افظع من اي حد والحمد لله, انتي بس الي هبلة وضيعتي ولد زي الفل من ايديكي.
ندى: يلا, بلاش نتكلم في الي فات يا ايه.
اية: يلا , اهو كله نصيب.
ندى: ابقي سلميلي عليه.
اية: اسلملك عليه ليه؟, انتي جاية معانا بكرة ان شاء الله.
ندى: لا يااية مينفعش.
اية: انتي بقالك شهر مبتنزليش الا لبيت اختك ياندى, انا عايزاكي تخرجي وتتفسحي وتنسي الهم الي انتي فيه دا, انا عايزة اخرجك من مود الطلاق والقرف دا بقى.
ندى: بس يا ايه انا مش مطلقة.
اية: بس هتتطلقي قريب, انتي مش طالبة طلاق؟, نفسي افهم انتي زعلانة على شادي دا على ايه , والله مايستاهل تفكيرك خالص, الي زي دا يتكسر وراه قلة.
ندى: انتي مش فاهمة حاجة خالص يا اية.
اية: انا ماليش دعوة, انا عايزة اخرج وعايزاكي معايا, والشلة كلها ملمومة, اول مرة المكو من سنتين, حرام عليكي, لازم تيجي معانا انتي فاهمة.
صمتت ندى قبل ان تقول.
ندى: بس شادي لو عرف....
اية: انتي لسه خايفة على زعله, ياماما شادي كل يومين يشوفوه في مكان شكل مع شلة شكل, دا لو عرف ماهيصدق, هيقول كويس انها جت من عندها.
دمعت عينا ندى لكلمات اية.
ندى: كل يوم في حتة شكل.
اية: ايوة يا بنتي انتي بس الي مخنقة على نفسك وعلينا, انا مش هسيبك اصلا, غصب عنك هتيجي معانا.
صمتت لحظات قبل ان تقول بعزم.
ندى: ربنا يسهل ان شاء الله.

نائب الرئيس

هو انت فعلا اتاخرت جامد

بس انا قراتها فى حته تانية بقى مقدرتش استنى
شكرا انك نزلتهم مجهود حلو

زائر

ماشى اووك
شكرا لمرورك ريتا

اللواء

تسلم ريو مجهود رائع

اللواء

تسلمايدك ريو وشكرا علي مجهودك

زائر

شكرا جزيلا لموروركم ريمو وحماقى نورتوووووووووووووا الموضوع

اللواء

تسلم ريو حلقه جامده جداً

نائب الرئيس

ميرسى اوى على الحلقات ياريو

زائر

شكراااااااااا جزيلا لمروركم نورتوا جامد الموضوع

مواطن

عجبنى اوى اشكرك اوى

زائر

العفو يويو نورتي جاااااااااااااامد الموضوع

» سؤال سهل بس اللى بيجاوب ............................
» لو عايز تعرف غلاوتك عند اللى بيحبك ادخل هنا
» ازاى تخلى اللى قدامك يحبك فى ثوانى
» اعرف ايه اللى شاغل بالك
» مقالب نار لكل اللى عندها اخ وقرفها فى عيشتها ..